移至主內容

2019年2月號10周年紀念刊 - 勁揪體

過去兩個月約同勁揪體創作人Kitman 訪問/拍攝,加埋聯絡短訊,可以話溝通得仲密過啲親朋戚友。

同Kitman文兄結緣,其實係始於佢搞眾籌做勁揪體,果陣因689關係,社會氣氛負能量甚重,就覺得文兄做呢單嘢好勁揪,忍唔住課咗金,心諗: 第日佢做到個字體出嚟,喺雜誌整返個封面字,係咪超勁揪先。

之後因「捕風一族」發現佢玩風帆,就更加堅定想做呢單嘢。

而家有封面字有訪問有片出街,睇住蟄伏咗兩年幾嘅諗法實體化。

點會唔勁揪?

其實做雜誌,冇心去做係冇可能一期又一期咁做落去,每個月睇住一大堆死線要應付,係真係會有壓力會驚。所以如果喺當中冇想做嘅嘢、想結識嘅人、想做嘅訪問,真係唔會支撐到落去。