移至主內容

匠心 --- 寫好每一個字

20180831
.
一間公司唔同團隊有唔同位置,唔同位置有佢本身嘅特性,適合唔同類型嘅人。

擅長呼朋引伴嘅人應該做PR,口才了得吹水吹到好似真咁嘅最岩做sell屎,如此類推......前排同腦細級前輩傾開,咩人最適合做production(製作部統稱)? 前輩話,係有「匠心」嘅人。呢個意見,我諗咗幾日。

匠心係咩呢?語出「獨具匠心」,形容藝術品精緻、有創造性,引申而言亦形容果啲喺任何情況下,都會盡力做好佢手頭件事嘅人;呢啲匠自我要求高,唔鍾意將貨就價,極端啲直頭係會寧願遲交貨都唔肯妥協質素嘅人。

我喺度諗,唔係喎,production撚以我所知唔係咁,大部分都會將貨就價;喂,俾幾錢做啲咩俾你,好正常丫。又或者可以話,好多撚本來係匠,好努力做好啲事,但時間耐咗,俾啲hihi磨吓磨吓,磨走棱角,漸漸擺低初心,話「唔想做爛個市」。 而其實所謂「唔想做爛個市」,只不過係懶而已。

能夠從一而終,堅持初心堅持做好件事先俾出街嘅蠢匠,其實市場裡面唔多 --- 當70分客人已經滿足,搞乜要100分阻住地球轉?

但偏偏,到頭來,5年後10年後,最多客戶求出山多Job接,亦都係呢啲本來係蠢匠嘅人。時日有功,通過一單又一單將70分做到100分嘅job,除咗累積咗名聲,最緊要係真係迫出咗實力。

而呢個迫出最佳嘅精神,呢個實力到頭來係自己的。

藝術家成日都話,㩒好每一下快門、畫好每一筆、寫好每個字、雕好每一刻......難嘅除咗做「好」佢,更難嘅係「每一下」,好唔好嘅嘢,好容易可以賴天氣賴死線賴合作嘅人,但做好每一下,係需要恆常嘅自我警惕、自我鞭撻,冇人會監管,一定唔會值得,有冇進步亦只有自己知。亦可能,妥唔妥協,就係藝術家與一般人嘅分野。

咩為之匠,舉一個簡單例子,明明個Job好奀係一個應份得過且過嘅價,但係攝影師都願意出額外裝備、體力去做好件事,廣義而言,呢啲就係匠心。