Mike X Kizuna Climbing 連結人與自然的絆

Mike導劉諾衡熱愛戶外運動，因此一身肌肉加上皮膚曬到古銅色的形象深入民心，無論樣貌有無打上格仔都好易認，相信亦令不少人因他而對戶外運動感興趣！透過他和團隊所製作的電視節目更將他對大自然的愛表露無遺，由外到內他都彷彿是戶外運動代言人。他和喜歡攀石的朋友合資開設室內攀石場Kizuna Climbing，名字取自日文漢字「絆」，意指人與人之間的深厚情感連結。這亦是他和自然的一個連結點——因為拍攝郊遊節目認識了戶外抱石這項活動，他由室內攀石場玩到戶外，結識了很多攀石朋友，亦促成了開設攀石場的緣份。

他說：「我鍾意團隊一齊打拼嘅氛圍，所以無論運動或者工作，都希望有一班人一齊做！

名詞解釋：
Kizuna - 日文漢字「絆」，意指人與人之間的深厚情感連結，包括親人、朋友或有同樣志趣的人。

運動的絆

眾所周知Mike喜歡潛水和攀石，而在他的節目中更經常上山下海，他坦言自己的確較喜歡與大自然接觸的活動，在去年一個座談會中他便曾分享自己中學時就喜歡看動物紀錄片，更曾經想做生態攝影師！所以雖然室內和戶外抱石對Mike來說各有魅力，但亦不出所料他較喜歡到戶外抱石，「我覺得戶外抱石同大自然的連結多啲。室內爬到最頂兩隻手掂到Top嘅石頭就為之完結，但係戶外要爬上石頂，站在上面才算完，征服大自然嘅感覺更強烈。我鍾意爬較高和大塊嘅石頭，危險性較大但亦更有挑戰，所以雖然戶外和室內各有難度，但上山爬更多一重驚險刺激嘅感覺，對我來說樂趣亦更大。」

不過，攀石是Mike兩年前才開始的愛好，對他來說連結最深的運動非獨木舟水球莫屬：「我由17歲開始玩，玩獨木舟水球識了一班朋友到而家，係我人生中識得最耐嘅朋友！不過近年我和隊友都因為要工作而漸漸少了打球和比賽，攀石便取而代之成為我一個經常玩嘅運動。」直至四年前為止，他和隊友一直有參與獨木舟水球總會所舉辦的比賽，他更曾擔任裁判，不過相信近年他要製作的節目愈來愈多，工作忙碌令他難以兼顧：「香港較難發展運動嘅原因，可能就係因為運動方面嘅支援較少，很多熱愛運動嘅人都要投身工作而離開嗰項運動，哈！」

團隊的絆

製作人的工作現時是Mike的重心，即使因為對攀石的喜愛而開設攀石場，他也笑言自己年資尚淺，開設攀石場並沒有特別抱負，只想有得玩，因此決定得也很隨心：「我一向都是感覺到了便去做，而且開岩館始終係我同Partners嘅副業，我哋都鍾意攀石，就決定畀幾年時間試下，前題係唔好蝕錢，哈！自己有得免費攀石，又可以叫朋友一齊去攀石，順便推廣哩項運動畀多啲人去玩，諗落都幾好！」說得隨意， 但說真的，攀石又何須自己開館？一切的緣也許是攀石場氛圍帶給他的一點憧憬：「我去過香港大部份岩館，職員都好親切，雖然每間都有不同感覺，但也有共通之處，就是無論職員或者攀石嘅人都好似朋友，大家都會很友善分享和交流。我哋個場叫做『絆』，都係因為我鍾意哩種人與人之間嘅連結。」

為了這種「絆」，他和拍檔選址時也刻意找了熱鬧的地方：「選址時本來想找油尖旺這類人流較多嘅地區，但租金較貴而且較難有合適嘅空間，最後選擇了將軍澳一間商場，各方面條件都適合，因為攀石場首要是樓底高。而誤打誤撞下，我哋發現這區多家庭和小朋友，雖然我自己當這運動是休閒為主，並無很偉大目標，但如果開在商場可以由小朋友開始推廣到這項運動都好。」

Mike多次強調攀石是個人興趣，但有留意他IG的人都曾見過他攀石的密度頗高，「運動對我來說是玩樂也是減壓良方，但係節目製作期間我可能一天工作十五、十六小時，根本難以再擠出精力去做運動，就算我幾鍾意做運動，都寧願瞓多兩個鐘！ 所以忙完一個週期後，我通常會有大概一兩個月較空閒，我便會報復式去做運動、瘋狂去爬石！去室內抱石場就會比較慳時間，可以把握時間玩多啲！」後來運動場所被逼暫時關閉，他才轉戰戶外：「我鍾意戶外，但去戶外爬石就受限於季節性，夏天去戶外真係好熱，成身汗黐立立，行山又辛苦，都係室內抱石舒服啲。」無論多熱愛運動，Mike也因為工作而無奈調整運動日程，「我工作時習慣全副心神投入，運動或其他事情都好難侵佔時間。所以開攀石場很慶幸有伙伴一起做才能成事。」就如他製作節目時有好拍檔「無制限OT編集団」，做運動或開攀石場他也享受團隊合作的感覺。「就好似玩攀石，我哋會約埋喺攀石場或者出山，一齊完成一條線又好、一齊失敗又好，都比較好玩！」

特約主持 - 怡富試玩

Kizuna有Mike導不定時駐場，怡富認為是「朝聖肌肉」的最大吸引力；此外，牆身上有大大隻毛筆書法字「絆」，加上黑白色調十分有型有格。

怡富：「由於新店在商場內，面積不是十分大，只有一幅主力牆，但有一些打卡專用的路線，成功挑戰後影相的效果會十分有型！抱石其中一種絆就是朋友之間互相支持大大聲喊Come on、Come on，一起練習，不斷嘗試。」

Text: Nicole, Ivan
Photo: Jack, Gabriel, 受訪者提供
Design: Jo