打咗十幾年波想分享一下心得｜輝之筆去
最近習慣每日在社交媒體分享自己對打波的心得。我認為不只限於手球，而其他運動項目，甚至在生活上都可以應用。不知道以下有幾多條會令大家有所認同呢？ 今日先同大家分享十日。
Day 1
五五開嘅比賽，永遠都係打最後十分鐘甚至五分鐘。通常打完頭五十分鐘都係平手，嗰時比賽先正式開始，所以要練就練最後五分鐘。
Day 2
一開波有氣有力，個個都係球星；比賽末段表現同開波一樣就真係球星。
Day 3
七成醉最勁——係身體狀況不佳嘅情況下訓練，例如疲態、缺氧、頭暈等等極端情況，讓身體、心理、頭腦都習慣喺哩啲情況下都能夠正常運作，模擬比賽末段體能不足嘅情況。如若返到身體狀態正常，球場表現就會好穩定。
Day 4
要學習如何喺受傷情況下比賽，因為我哋幾乎冇可能喺百份百身體健康下比賽。應該在有傷病嘅時候都打到好似無傷病咁，否則受傷哩個藉口只會成為每次輸波嘅藉口。
Day 5
瞓覺係好好好緊要。大部份運動員長時間瞓緊覺或者休息緊。
Day 6
一係贏但悶，一係輸但有趣，前者係職業，用最少付出有最大收獲。例如用同一招一直贏，就要一直用，哪怕全場只用同一招。後者係業餘，會做多餘動作而影響結果，做同一個動作太悶無樂趣，所以轉用新招，繼而失誤。
Day 7
如何適應唔同球隊打法？
若果一個球員可以好快融合新球隊打法，就係一個有水平嘅球員。雖然未必係球員自己擅長嘅打法，但都會配合到球隊為先，適應完之後再加插少少自己擅長嘅打法，唔會影響本身球隊體系。
若果一個球員適應唔到新球隊打法， 球員嘅閱讀球場能力及基本功就有待改善，比較似背書式打波，打波手法變化唔多。如果球隊風格唔啱自己， 就好難融入。
*靈感來自當時我在法國打波，唔識講法文，好似啞左咁打波， 好多嘢想做想表達都做唔到，淨係透過觀察球隊再判斷配合已經好吃力。
Day 8
關於射波
中內柱世界波入波計一分，射五號位入波計一分，總之入波就計一分。射波射上角易入，因為守門員比較難守，例如身型同距離因素，當守門員日日訓練拍四角，自然唔會再輸，除非球速快過守門員反應，否則好難入。只要個波過到守門員就係好波，角度刁鑽只係其中一個方法，仲有好多其他方法，想知可以再分享。
Day 9
球場上嘅節奏比速度更重要。
永遠都有人比你更快更高更遠，除非你係世界第一；同埋我哋唔係田徑比賽，最快最高射得最遠，唔代表就會贏，只係有優勢。
Day 10
入波贏掌聲，防守贏球賽，一分包含一攻及一守。
入波+防守到=1分
入波+防守唔到=0分
唔入波+防守唔到= -1分
所以防守到一個進攻先可以拎一分。雖然我係進攻球員，但防守都係我心中最重要。最理想嘅防守係可以令進攻球員進攻時都會消耗體力，當進攻及防守兩端都無得休息，進攻自然效率下降——球速下降和失誤上升等等。
