建立團隊氣氛的重要性｜鈞動敢言

By 陳肇鈞, 31 十月, 2024

建立團隊氣氛的重要性｜鈞動敢言

今期想講返啲關於足球嘅事情。如果講人數，足球係一個比較另類嘅運動，一隊波上上下下包括職員及軍醫至少三十人。去到我呢個年紀，除咗球場上嘅表現，我嘅責任亦可能擴展到平衡同關心球隊成員之間嘅溝通同整體氣氛，所以今日講吓關於職業足球隊建立團隊氣氛嘅話題。

一隊球隊有外援、本地球員以及年青球員。先講本地球員，我對呢方面有比較多嘅要求，因為一季流流長，華人球員之間嘅關係同相處氣氛好，會令球場上大家發揮到超水準表現。我鍾意練完波一齊食飯、出席活動嘅時候會夾時間一齊出發，或者去集訓嘅時候會用多餘時間一齊相處，甚至乎比賽後放假嘅日子都可以俾少少時間一齊放鬆。原因係咁樣先至係一隊波，咁先有為大家犧牲同付出嘅感覺，去到球場除咗會為球會搏盡，隊友間亦都會互相保護，為嗰份兄弟情拼最後一口氣。

至於外援，呢個係比較煩惱嘅問題，如果佢哋一向嘅性格係easy to get along，咁就當然少一個煩惱啦。不過咁多年嚟，我都遇過唔少唔容易相處嘅外籍球員。大家首先要明白，外援球員嚟到香港未必一定係為球隊賣命，佢哋嘅目的可能只係搵錢，或者以香港作為踏腳石。球員有呢啲逗留喺球隊只不過係短暫性、作為「過客」嘅想法，未必想同我哋一齊建立團隊氣氛。我遇過一啲好驚蝕底，唔會同我哋一齊搬物資，亦唔會同我哋一齊食飯，練完波各自各返屋企，基本上同陌生人一樣，零交流零溝通。

呢個係一個我唔鍾意見到嘅現象，佢哋有佢哋嘅諗法，我哋華人有自己華人嘅諗法，好容易因為一兩個誤會，引致衝突同分歧。有啲球會有大筆經費聘請高質素外援，不過到最後都解決唔到溝通及團結嘅問題。所以點樣將一隊波融為一體係一種學問，有時唔係話有錢就建立到一隊觀眾想見到嘅球隊。幸好我呢兩年喺大埔足球會，球隊挑選嘅外援都好配合，隊內氣氛都維持得非常理想，大家會互相關心。現時大埔唔只係打card出糧到合約尾就byebye嘅一間公司，而係令球員真正有歸屬感嘅球隊，融為一體嘅成功，亦直接提升我哋嘅成績。