我的三個爸爸──意大利爸爸｜Road To Paris

By 蔡俊彥, 30 七月, 2024

我的三個爸爸──意大利爸爸｜Road To Paris

最後哩篇係講我嘅意大利爸爸。意大利爸爸嘅CV非常豐富，佢嚟香港之前分別教過意大利隊、俄羅斯隊、美國隊等世界頂級實力國家，講真一定勁過當時嘅香港(2020年)，做咩咁遠水路過嚟教？我冇問過但我覺得係因為香港有我囉！（講笑）

佢嚟之前我有睇過佢喺ig post嘅體能訓練片段，自己有偷偷試過佢嘅program，都唔係好辛苦姐，都幾有用。佢應該係2021年差唔多東京奧運嘅時候加入香港隊，第一日訓練，睇過咩料先！行入個gym，佢話去單車機，哦好呀熱下身先平時都係咁慢慢踩。佢話「all out, fastest you can」我心諗好呀let’s go~

(10秒後)
佢：STOP！
我心諗：Easy hehe
佢：rest 50 seconds then do again
我：吓！

如是者重複咗十次，有啲累啦⋯⋯唔係，仔細感覺下，都真係幾累。
佢：rest 3 minutes we redo
我：教練，what 123456 you say?

繼續做⋯⋯
做多咗十次，都未完，休息三分鐘再做多十次。
Bomb！原地爆炸！做完我即刻瞓咗喺地下，唔使飲醉都有hangover 嘅感覺。

佢嘅出現簡直就係惡夢嘅根源。之後嘅訓練非常艱辛，我覺得我似一個軍人唔係一個運動員。但久而久之，的確感覺到身體有出現變化，好似打比賽冇咁易累。佢好似真係有啲料到！

意大利爸爸唔單只係體能教練，仲係一個劍擊教練。日常都會同我哋進行單對單訓練，調整我哋嘅動作，因為有時我哋可能打實戰強度太大而動作變得粗疏。

佢仲係一個鐵人，相信鬥勤力應該冇人夠佢嚟。我哋有時候喺歐洲搭飛機返嚟係香港朝早七、八點，大家都返屋企休息啦，而佢，先係去做gym，然後就返工，幫一啲冇出外比賽嘅運動員進行訓練，直落到夜晚⋯⋯

又勤力，又好學，又有實力。佢嘅優點多不勝數，但我個人最喜歡嘅係佢嘅善心，佢對運動員嘅真誠。佢唔算係好叻講嘢，但每次我輸比賽心情非常沉重嘅時候，佢都總係喺我身邊，陪伴住我，諗盡辦法安慰我。哩個世界共富貴容易，能夠與你共患難嘅人實在罕有，必須要珍惜。佢未必因為我所以嚟香港，但我會因為佢，而繼續堅持，我好想佢為有我哩個學生而感到自豪。

每次喺意大利打比賽我都有一個願望，希望可以拎到獎牌送畀佢。無奈每次都打得唔好。希望下一個賽季可以實現到哩個願望啦！！

Coach, ti amo ;)