我的三個爸爸──法國爸爸｜Road To Paris

嚟到法國爸爸。我同法國爸爸於2019年喺香港體育學院正式認識。在此之前其實已經喺比賽場上碰過面。當然我地年齡有一定差距，所以唔係我同佢比賽，而係我同佢學生比賽。

佢個學生係一個法國名將，多次喺國際賽事獲獎。當時係我首次打入世界賽事三十二強，毛巾都冇拎去劍道，諗住一節三分鐘內同呢位世界級選手決一生死。結果不出我所料，比賽進行得快，好快，但就係我落後14-8……但唔緊要，我唔放棄，咬住追吓一分，再追吓又一分……機會嚟啦追到14-12！等我嚟個絕地反級先！！

裁判嗌「預備，開始！」呢啲咁關鍵嘅moment，佢一定會使出佢嘅絕招，快速進攻，我估到你啦哈哈，上前得咁快，一定咭得冇咁準！我閃！！

Oh…比佢拮到…輸咗…

有少少失落，但當時排名唔知幾多嘅我，同一個世界級選手有咁樣嘅戰績已經好唔錯，相信一定已經得到對手嘅尊重。我上前同對手握手，再同對手教練握手，冇錯就係法國爸爸，佢點頭同我握手，一定係對我嘅肯定！

好啦，係香港熟咗之後，我問佢：“remember the match in Shanghai (還記得上海的比賽嗎)?”
He said：“nope”
Me：“….$@&$!!??977”
咩料呀-.-

算啦…唔緊要，當時佢初嚟香港報到無耐，我都略盡好客之道，同佢講：“if you need anything, let me know!(你需要甚麽讓我知道!)”

結果，我帶比佢嘅唔係幫忙而係煩惱，我有一個問題令佢永遠永遠非常不滿意—遲到。仲要鑊鑊早上嗰節都好準時咁遲五分鐘，佢已經推出過遲到罰錢呢啲政策，希望減低我遲到嘅機率。結果，都冇用，我好似仲要偷偷改咗個record，數都冇找。直到而家，佢基本上已經放棄咗我…（對唔住…我會改的…)

同呢位爸爸深刻難忘嘅事真係數之不盡，可能可以寫本書。我今次極為簡單先寫佢嘅優點，我仲記得佢第一次同全部隊員開會，佢話會逐個逐個搵我哋傾計，了解一下我哋打劍狀況，更重要仲有我地嘅personal life。直到而家佢都冇食言，佢已經不知不覺教咗我哋五年，至今佢除咗關注我地劍擊技術，亦好關心我哋嘅日常生活。因為佢深信我地活得開心先可以喺比賽有好嘅表現，呢個道理亦係佢嚟到香港令我得到嘅最大領悟。

相信如果可以同佢其他國家嘅學生，返自己國家攞到奧運獎牌，一定係一件非常𢸍撼非常了不起嘅事。雖然今年無緣同佢一齊返巴黎，但我喺呢度祝福佢同家朗可以攞到好嘅成績！“Good luck boss.”

Text, Photo: 蔡俊彥
原文刊於《運動版圖》2024年8月號