旁述的心路歷程（二）｜Road to MARS

經理人：笑多啲唔該！
Me：Ok-,-（心諗：笑乜嘢笑，笑笑小電影咩）
經理人：I have something to tell you!
Me：okkkkk

From 某某網絡論壇

Me：⋯⋯
嬲咗。好嬲！十世都唔睇comment，一睇就咁。算！頂埋佢，收錢走人，之後專心訓練比賽。
自己手痕忍唔住再search下啲comment⋯⋯

喂！好似唔對路，會影響其他工作人員，影響VIUTV。
「邊有咁唔公平，識打唔等於識講」
「運動員，係咁上下，又唔係專業」
「大師兄，專業！」
好公平？！唔係呀，呢個世界好唔公平，我要又打得又講得。我要贏，我要做好哩份工。

隔離台講得好？！好，撳入去聽下。呢個台好耐冇睇過，唔理啦都睇吓啦。講真，係冇乜結論嘅。我自己都唔係好知咩係好咩係唔好。睇返自己啦⋯⋯嘩真係講嘢好「𦧲」。冇乜信心咁。語調平平。死啦哩啲嘢短期內執唔返。點算⋯⋯
一句comment突然浮現︰

咩話？？好！死就死，豁出去！！
正式On Air：
丹尼爾：兩位專業旁述有咩意見？
我：各位家庭觀眾⋯⋯(窒一窒)(暴走mode on)已經好夜啦，冷氣開細啲，飲多啲維他命C，唔好因為睇比賽搞病自己！
強尼：Ryan講得啱呀⋯⋯(佢可能心諗：我噏緊乜嘢⋯⋯唔理啦，諗到乜就講乜啦，唔好太多顧慮！)
我：⋯⋯
丹尼爾：⋯⋯
Miss Yeung：⋯⋯
我：⋯⋯
Miss Yeung：⋯⋯
我：⋯⋯
(wow，我講咗好多嘢～)
Few moments later.
丹尼爾：法包對戰菠蘿包，究竟誰勝誰負呢？
我：菠蘿包啦希望！
（Vivian 勝出)
我：菠蘿包戰勝法包啦！
全場：hahahahah
Miss Yeung：⋯⋯
強尼：⋯⋯ Ryan 你有乜嘢感受？
我：Er⋯⋯我好眼瞓，不過都好開心⋯⋯LOL

Day 1旁述完結，感覺自己好似有啲唔同咗。

之前好多時諗到嘢想講，準備想講，但就會情不自禁再諗多一下，然後覺得好似咁樣講唔係最好，都係唔好講，諗到再好啲先再講。哩個現象不斷重複，無限輪迴，最後講得好少，甚至選擇乜都唔講。哩個唔單只發生喺旁述嘅過程，往往喺我嘅日常生活之中都經常發生，尤其係面對陌生人嘅時候。

經歷完Day 1旁述，我感覺到自己變得把口快過個腦。有乜大膽講咗先，唔好諗咁多，起咗第一句先，然後邊講邊思考。好多時句子開頭未能適當表達意思，但相信自己，繼續講埋落去，好多時會兜得返。最終，句子整體都會變得順𣈱。然後keep住哩個心態同人溝通，嘩，自己好似變得更加勇於表達自己意見，更加夠膽同人講嘢。

我諗，哩個正正就係I人(內向)同E人(外向)嘅分別。好多本身識識哋我嘅人都不約而同地發訊息畀我，「乜原來你咁多嘢講㗎」，「其實你都幾好笑」。最好笑嘅係我都唔知自己可以咁。有時候，人都係要去到絕境，先可以逼到表現，逼到自身嘅一啲特質出嚟。

當晚，因為晏晝飲咗咖啡，加上我期間限定地變咗E人，個腦一直高速運轉。返到屋企已經凌晨4點，但遲遲未有睡意。直到6點終於瞓得著，但10:30就醒咗瞓唔返。啱啱領悟到「個口快過個腦」嘅新技能，加上惡劣嘅睡眠質素，當然唔會令大家失望啦，好快就出事了⋯⋯(下回待續)

Text︰蔡俊彥
Photo︰作者提供
原文刊於《運動版圖》2024年10月號