談《足球女將》｜鈞動敢言

By 陳肇鈞, 29 四月, 2025

談《足球女將》｜鈞動敢言

近期引起全城關注嘅ViuTV《足球女將》，非常適合一班男觀眾及鍾意足球嘅球迷收睇。當然，小弟亦有參與客串做吓嘉賓。一眾參與者非常之落力，做咗一套好好睇嘅節目，稍後會抽幾位女士們表揚一吓。不過今集嘅話題想轉移去講吓，哩個節目成功嘅元素。

近期發現好多綜藝節目或者推廣運動嘅活動都係同足球有關，我相信都唔需要本人去話俾大家聽足球其實係有幾受歡迎，而《足》正正擊中大眾嘅需求：節目話俾大家聽，無論任何年紀、背景嘅素人，都可以由零開始去學踢波，只要有正面嘅學習態度加上小小嘅興趣，學足球絕對唔係冇可能嘅事。一班女演員，都講到明係女演員，由一場足球比賽幾多人落場都唔知，去到每個人都可以知道點樣控、傳、射，真係好值得尊重。

佢哋亦都傳遞咗一個訊息，足球係一種連繫友誼、促進感情嘅運動，所以幾時都話足球係凝聚一班人最好嘅活動。

我非常欣賞佢哋嗰種毅力，絕對唔係話要搏機會出鏡，而真係見到佢哋熱愛足球、熱愛運動嘅拼勁，每一位都真係能夠將足球同社會拉近距離。喺度唔能夠逐個有參與嘅朋友都提及，但如果要抽幾位出嚟，我想特別講嘅第一位係Vivian Ma，一位退役單車選手，雖然運動細胞比較強，不過我見到佢嗰種落力，自己有份正職，都可以每朝早六點去練波，有多餘嘅時間都去加操，為嘅就係做好哩件事，呢方面有少少似我：「一係唔做，一做就做最好」。

第二位係NB，我覺得佢好有感染力好正面，雖然都係運動底比較強，不過因為佢好肯帶住一班運動冇咁強嘅隊友去突破界限，我非常欣賞呢一點。

最後一位係Rose Ma，佢運動細胞絕對冇其他人咁強，不過勝在肯學肯捱。佢會用盡方法去了解更多，有時亦都會參考我嘅意見。非常尊重嘅係，佢比我感覺係破釜沉舟咁去諗方法進步，用盡一切俾觀眾見到一個唔同嘅佢，我亦覺得到最後，佢成功咗。我親自入場去睇佢哋最尾嗰場比賽，我亦都見到佢搏晒命去表現自己，波底一定唔係最好，但係態度一定唔會輸蝕。

足球絕對唔係一個容易嘅遊戲。經過半年嘅操練，到最後每一位都冇可能變美斯。不過佢哋話到俾我哋聽一樣嘢：「想做好一樣嘢就一定要付出」。佢哋做咗一個好值得回味嘅節目，帶咗好多正面嘅訊息，你問我嘅話，我亦好希望見到有第二季。節目贏得好多掌聲，而掌聲背後好多人都唔知嘅就係一眾演員及職員嘅血汗。我會比較明白，因為我喺呢個運動入面都係過來人。

再講多一次，好多謝佢哋，非常精彩嘅題材。最緊要係佢哋將足球更加融入我哋嘅社會，並且成功地展現出毅力，表達出足球呢個運動係咩一回事俾大眾認識。