一路走來｜源來如此

好多人問我，作為香港第一個輪椅羽毛球運動員，條路係點樣行出嚟嘅呢？

坦白講，路途絕對唔簡單。有啲時候，我都好羨慕其他隊嘅年輕運動員，喺成長、發展嘅過程中，有師兄師姐提攜，有前人嘅路徑可以模仿。既然我堅持揀咗一條同人哋唔同嘅路，就要走落去。

仲記得啱啱離開醫院，由於我身形高大，以及年紀尚輕，有唔少其他運動項目希望我可以加入佢哋，但我都一一拒絕，甚至係喺冇嘗試過嘅情況底下就拒絕咗。因為我係一心愛着足球以及羽毛球，既然足球唔可以完成，最少我都留喺羽毛球嘅懷抱。成為運動員最初期，我經常都徘徊喺無奈、無助以及質疑嘅情況底下。喺香港，冇人知道輪椅羽毛球係乜嘢，冇教練識，冇球員識，甚至冇一個市民認知。每次同人講我係一個輪椅羽毛球運動員，就好似同人講緊少林功夫加足球咁，人哋都以為我喺度講緊笑，甚至有好多運動嘅持份者，包括總會、朋友，甚至親人都唔贊成以及唔理解——點解我會揀啲毫無根基，毫無前人足印嘅運動項目嚟走？仲有啲人覺得我係攞我嘅運動人生嚟「較飛」(冒險)。

我份人比較簡單，只係有一點點硬頸，可能就係因為咁我適合做運動員，而且係一個全香港冇人做過嘅運動項目嘅運動員。我知道喺毫無成績，毫無代表性嘅情況底下，我係唔會說服到人哋香港會出一個家傳戶曉嘅輪椅羽毛球運動員，而嗰個會係我。所以過去嘅十幾年，我默默咁做，默默咁樣練習，中間唔單止身體以及意志要鍛煉，更加要接受經常徘徊喺孤獨以及無助嘅情況底下依然每一日努力訓練。孤獨嘅係從來冇人理解，無助嘅係喺香港發展輪椅羽毛球，每一件事都要自己解決。

雖然係辛苦，但係都有好處。首先我比人哋經歷更加多，更加清楚一個新嘅項目喺香港應該點樣發展。由冇人玩，到有世界級運動員，由一個非奧運項目，發展成為奧運項目，由冇人認知，發展到成為一個連續兩屆殘奧攞到獎牌嘅項目。

其次，雖然我走嘅路比人哋更加不平坦，更加遠，但係一路走來更踏實，因為每一步都係我自己安排，不假手於人，到最後我講出嚟嘅輪椅羽毛球故事，會比別人更好聽，因為故事中嘅每一個章節都係由我編寫。到咗今日，我成為咗兩屆殘奧嘅獎牌得主，所有人都知道我當初揀嘅孤獨而無助嘅路，係選擇得對。做咗咁多嘢，我並唔係想話俾人聽我特別叻。只係想話俾其他人聽：可能性！

每個人都有佢嘅權利去探索無限嘅可能，而每個人都無資格去批評人哋嘅可能，最少喺結局出嚟之前唔可以。好多人去追求與眾不同嘅可能嘅時候，會怕人哋話佢傻，會怕人哋話佢天真，但正正就係哩份傻同天真，顯出我哋個人嘅獨特性。而最後無論我哋追嘅可能性嘅結果係點，精采嘅過程，都足以令我哋回味一生，而哩一份獨特，亦會令到我哋自豪而無悔。

Text：源來如此
Photo：作者提供
原文刊於《運動版圖》2025年4月號
更豐富內容請支持印刷版或電子版！