冒險原來是進化 - B-Girl Lady Little 

//邊個堅持到最後就係邊個勝利，所以我哋（Breaking圈）更加要團結去將精神傳承落去。//

個子矮小，年紀又比其他三位港隊成員年輕的Little，雖然年紀輕輕但實力非凡，野心亦不比他們小：「如果有人諗點解我會係港隊或者第一名，我唔會多加解釋，只係會想話畀佢哋知『你繼續睇我實力啦』。」對Little來說，她會視出戰奧運是自己在Breaking的成績表，並揚言過後的目標要和隊友到世界各地跳舞，讓其他人認識香港出產且獨特的B-Boys、B-Girls。

夢想是個奢侈品

「其實我可以做返個普通女仔，飲飲食食，扮下靚，搞到自己咁大隻做咩？」中學時要求一人一課外活動，Little誤打誤撞報了跳舞班，殊不知竟然是Breaking，Little笑說：「嘩一聲，全部係仔，做埋啲高難度動作，起初怯咗吓⋯」她的好勝心強，相信自己能駕馭它，就大膽地想證明給大家：男生做得到的，女生亦能做得到！自此Little便一直鑽研Breaking，為了達成願望不惜犧牲許多，十年來一直如此。

香港的B-Girl為數不多，她的努力和成長很快便得到大家認同，不過，當中有着很多辛酸回憶。Little說：「中學時同學鍾意成班人去玩，特別係女仔，但我次次都話要跳舞拒絕應約，自自然就畀人杯葛咗一段長時間。」她雖然把回憶說得輕描淡寫，但總會嘆一口氣，而她又同時明白自己需要甚麼，為了喜歡的事早已學懂取捨。日子久了，當時杯葛她的一伙人竟然對她的堅持表示欣賞，「可能出嚟做嘢之後大家識諗咗，佢哋無啦啦搵返我話『終於明白你堅持一樣嘢咁耐係為乜』，當時我都真係好開心，覺得終於有人留意到我嘅努力」。

女生跳Breaking要額外留意身體和力量，多加練習是警惕自己免得再次受傷——6年前Little 在一次表演中嚴重受傷，拇指骨裂並移位，韌帶受損，身心煎熬，Little 曾因此反問自己多次：「咁辛苦為乜？」純粹因為「鐘意做一件事」致令Little強忍淚水、強忍痛楚捱過去，她說：「其實只要你好鍾意一件事，你唔會想放棄做落去；受傷係因為自己嘅不足啫，要好好正視而唔係忽略。」

團體精神是令Little 跳了11年的理由，淚水痛楚是她的動力：「搵到一班志同道合嘅朋友係好難嘅事，如果大家齊上齊落件事會變成點呢？」

備戰啟程

「每一位B-Boys、B-Girls背後都有好多辛酸，但我認為香港係夠格打入四強㗎！」Little 認為香港Breaking 舞者實力對比亞洲其他國家來說水平不高，但絕對不是大家差，或許是不夠團結才令香港未能在亞洲區突圍而出，另外更是資源嚴重的缺乏：「入得港隊就要肩負幫香港打分嘅責任，要靠大家嘅團結努力。我更加希望政府能夠關注我哋係新鮮出爐嘅港隊。這次去巴黎比賽，見其他國家代表隊有派Cameraman、按摩師，很有系統，而我哋好似輸咗個陣咁。」

作為年紀最細的港隊成員，Little 卻從容不迫，以「心態戰勝一切」面對日後挑戰，她說：「冇咗比賽真係差好遠，大家都會好易懶散，所以一定要逼自己，練習又好，做gym 又好，要長時間係嗰個mood 度。」自從有了Breaking 加入奧運的消息，Little感受到圈中的B-Boys和 B-Girls 更加投入進步，她更感受到大家因為自己加入了港隊，會視為良性競爭對手，「你會見到其他人因為我哋入咗港隊有股力想衝前，所以自己唔可以怠慢，辜負大家對我哋嘅肯定同埋期望⋯⋯」

Little 多番強調大家要將目光放遠，不應停留當下的表面，要令Breaking 在香港得以強化發展，最重要是「同行」：「就算我哋係唔係港隊都好，唔好諗打低邊個就算，係要靠大家喺唔同嘅位置去團結呢件事。」

對Little而言，香港這個地方確實締造過不少奇蹟，大家更要齊心合力，讓外間看見「香港製造」的舞者是什麼模樣。

(完整封面故事收錄於《Sportsoho運動版圖》2022年3月號)

Text: Dorz
Photo: He-man、Conrad
Design：Alice
Graffiti: Uncle@AWS