勝利球迷｜源來如此

上個月，筆者的愛隊曼聯來到香港，並沒有出現好似十二年前那樣萬人空巷，而因為曼聯近年嘅成績唔好，大家也沒有像以前咁踴躍追星，而大部份球迷亦本着「幸災樂禍」以及「落井下石」的心態去看待今次曼聯嘅亞洲之行。

的確，曼聯今屆嘅成績係強差人意。筆者愛上曼聯超過三十年，自從傳奇領隊費格遜爵士退休之後，近十多年的而且確對一眾曼聯球迷來說係好折磨，而正正因為咁，令我哋更加睇出邊一啲係「真球迷」，而邊一啲係「勝利球迷」！5月30號當晚，見證住超過33,000名球迷入場睇哩隊歷史最差嘅曼聯，見到曼聯入每一球波嘅時候，三萬幾名球迷震臂高呼，以及瘋狂慶祝，嗰種興奮，令到我都有少少感動。始終喺功利嘅社會入面，你成績好嘅時候有人支持你，唔難；但係當你成績差嘅時候，球迷依然對你不離不棄，哩個先至係真愛！

我哋一眾運動員，每當亞運、奧運嘅時候，自然成為市民嘅討論話題，打得好嘅時候就將你捧上天，當你稍有少少打得差，就會引來口誅筆伐。其實運動員都係人，我哋都會有處理得唔好嘅時候，會有唔自律嘅時候，會有情緒差嘅時候。喺國際賽上哩啲咁高水平嘅賽事裏面，勝負本來就只差一線，再加上我哋可能有情緒、狀態有高低、有傷患等等唔同嘅問題，勝負根本就唔可以預測以及捉摸。有好多球迷覺得這些對手我哋一定要贏，或者某些對手我哋一定會輸。如果比賽係按排名，按牌面去定輸贏，何必還要比賽呢？

運動員每日努力訓練，並不是每個都可以取得好成績，可能因為天份、體格、傷患等等，令成績有所不同。但在我而言，每位運動員都值得大家支持，值得你為佢喝采。無論表現好壞，無論贏定輸，只要盡了全力，都希望大家全力以赴地支持。

有句話說得好好：「贏我陪你君臨天下，輸我陪你東山再起！」

你可不可以成為一位這樣的球迷？

Text：陳浩源
Photo：作者提供
原文刊於《運動版圖》2025年7月號
更豐富內容請支持印刷版或電子版！