輪椅羽毛球的裝備需求｜源來如此

我拎拍打羽毛球就多，但係執筆寫文章就極少，今次第一次同大家見面，就同大家講吓到底輪椅羽毛球運動員嘅裝備同普通羽毛球運動員嘅裝備有幾大分別。

首先輪椅羽毛球最大嘅工具就梗係輪椅啦，而我哋坐嘅運動輪椅同日常大家見到嘅日用輪椅係有好大分別嘅，首先大家會見到兩個側邊嘅轆係「八」字，主要係方便兩側轉動，同埋防止左右傾側嘅時候輪椅會向左右兩邊反轉。其次就係喺輪椅嘅後面會有兩個小轆，以防止當我哋向後躺平打球嘅時候，輪椅會向後反轉，所以我哋叫呢兩個轆做「防反轆」。其實我哋高水平嘅輪椅羽毛球運動員，每部輪椅都係度身訂造，以符合我哋嘅身高，手長及重量，而每一部度身訂造嘅比賽輪椅都係十分昂貴，而我用緊嗰部就需要港幣大概七萬蚊。

其次，輪椅羽毛球運動員通常會佩戴手套以及用膠布捆綁手指，以防止手部同輪椅磨擦而引起水泡。因為羽毛球呢個運動要我哋手部好靈活咁運作，所以我哋通常都係用容許手指靈活郁動嘅橡膠手套，就我而言每星期都會損耗三對手套。

講起磨擦，輪椅羽毛球運動員都會因磨擦而損耗大量嘅羽毛球手柄膠(grip)，正常運動員我諗大概一個星期換一條grip，而輪椅羽毛球運動員一星期就會用超過15條grips。

除咗grip之外，球衣的消耗都比其他運動員快，因為球衣經常同輪椅嘅兩側，以及安全帶磨擦，差不多練習十次就會磨爛一件球衣。

最後，可以講吓羽毛球線嘅損耗，有睇開輪椅羽毛球嘅朋友都知道，我哋嘅來回拍數比較多，平均每一球都打超過三十個來回，所以對羽毛球線嘅損耗特別大，日常訓練時，平均每星期會斷線四次，當訓練量最大時，球拍每星期會斷線六次。由此可見，輪椅羽毛球嘅訓練量及損耗量實在係好大。

所以輪椅羽毛球除咗多咗一部輪椅之外，其實亦多咗好多損耗品，以致平時要帶嘅工具及用具都比平常人多。

下一次可以同大家分享吓，到底一項損耗率咁高嘅運動，運動員出外比賽嘅時候帶嘅行李篋要幾大，要帶乜嘢，要帶幾多？

Text, Photo：陳浩源
原文刊於《運動版圖》2024年11月號
更豐富內容請支持印刷版或電子版！